| |
| 瘦身手記 |
三地總決賽 |
 |
| |
1. 現時 144.5 磅，減了 2.5 磅
2. 現時腰圍 33 吋，減了 1 吋
3. 本周共跳舞 7 次 ，每次約 60分鐘
4. 減肥過程辛苦嗎? 程度 1- 10 ( 10 為最辛苦) : 3分
5. 減肥心得 / 感受 :
不經不覺12週任務真係完結了, 而我真係由167.5磅減到144.5磅, 共減了23磅. 腰圍都減了5吋. 係呢3個月中, 真係得多過失. 記得係第一個星期, 因為藥物令自己有d無胃口加上工作不愉快而有種莫名既失落感, 情緒極之低落. 打一個電話, 朋友當晚就出來開解我, 那刻既感動, 實在難以形容, 多謝Charlotte, Michelle, Man, Hayley.
之後我係依到公佈有呢項任務, 得到各方留言支持, 我係完全無諗過既. 又記得係第2個月中, 因為無減磅, 情緒都有些少低落, 有心既朋友就會打比我, 鼓勵我, 我實在心存感激係公司, 同事嘅支持都非常重要, 佢地每日都見到自己既變化. 瘦左, 會替自己開心; 心情唔好, 又會鼓勵一下.多謝Cecilia, Dorothy, Iris, Edmond, Margaret. Dorothy 亦係我既御用攝影師添!.
家人既配合都好重要, 例如要求佢地提早晚餐時間, 咁我就可以早點跳舞. 媽媽又會預備好lunch box, 買一些水果, 麥皮等等. 到晚上要跳舞時又會讓開廳嘅位置比我練習, 例如我姪女Zoe會幫我沖茶啦.
仲有兩位係SPACE一齊上堂嘅同學仔都會鼓勵我. 多謝Crystal, Bonnie
當然仲有一齊去跳舞嘅戰友啦, 大家都有交換一d心得, 一齊跳下舞咁, 都好開心架! 真係好希望比賽後可以保持聯絡, 互相鼓勵.當然要多謝型仔Gary悉心教導啦!
總之, 這一切事情都讓我感動, 令我有動力繼續向前行.
直到香港區決賽當日, 看見一點點從前嘅片段, 照片, 看見自己當時比較肥嘅模樣, 更加叫自己要keep 住. 大會當日播左一段姐姐給我鼓勵既說話 ,她說”係我心目中, 好多事情你都做到”, 那一刻我都未聽完就忍唔住, 我d淚水……, 我真係一個比較易受感動既人. 直到主持問我問題, 我都手忙腳亂. 連跳舞那一part都差點失手. 幸好都比自己合格啦. 當日我就得到最佳網誌大獎及季軍, 講真得到獎已經係bonus, 令自己在比賽過程中有啟發, 有得著才最重要, 只有咁樣先至可以令自己在日後既減肥路上, 繼續向前. 過了呢個比賽,唔代表要放鬆自己, 要更加努力去達到一個基本健康既指標.
經過今次, 自己對減肥定下一個大概既方法, 希望同一d都想減肥既朋友分享一下, 同時亦藉此警惕自己:
1. 決定減肥時, 要問自己有無好既心理質素去面對. 即係話自己既決心加信心足夠嗎? 有目標嗎?
2. 要定下一個大目標, 再分件將佢完成. 例如定下要減20磅, 咁就定下先減5磅既短期目標, 定下希望完成既時間, 唔好定下不可能完成嘅目標
3. 要將減肥既事公告天下, 好讓身邊既人警惕自己, 加上得到親朋好友支持下, 一定事半功倍
4. 要為自己做一個時間表, 計劃好要做既事, 幾時做運動, 幾時約朋友, 要有規律生活, 飲食先可以正常
5. 食物方面, 一定要有正常三餐, 以免食不定時. 就養成食零食習慣. 那一些是高脂食物, 盡量戒掉, 不要吃, “少食多滋味” 要明白自己食左d咩就有d咩出番黎啦.不要這喊著減肥, 那邊又不停吃. 了解多d食物中含有既營養, 盡量食一d比較低脂既食物, 清淡一d, 都可以唔駛捱餓
6. 燃燒脂肪, 只有做運, 沒有捷徑. 搵一樣喜歡既運動. 持之以恆.
7. 記住減磅唔可以咁心急, 輕得快, 升得越快! 始終人要正常輕磅先至健康, 有健康就可以繼續.
給戰友們
決定做一件事, 我會做得徹徹底底. 心想我既戰友既心態都一樣, 到時大家都可以互相支持鼓勵. 初時都有的. 但係呢到我想同大家講. “只有堅持, 才會成功”. 12週過後, 減肥路依然繼續, 希望大家都能互相支持啦!
給各工作人員
自己第一次參加呢類型既比賽, 從未係同一時間去認識一班新朋友. 雖然我知道剩下來會保持聯絡既可能得一兩個, 但不重要呀, 享受過程才重要.
22 plus 既Ada, 多謝你既幫忙, 我都係比較麻煩既一位. 好多時候我都想知道更多, 因為我想自己有好既準備, 來配合成個流程, 我知道大家工作都辛苦啦!
除左Ada, 當然有其他工作人員啦, 在此說對不起, 我真係唔知道你地既名, 但成件事上各人既努力都好重要.
給家人/朋友/同事們
對當日有黎支持我既人, 我真係唔知用咩說話去多謝你. 看見你地, 就算不說話,我都好容易感動, 唔知係咪人大左, 反而更加多愁善感?
雖然有d不是經常聯絡, 但係我心目中每一個人既出現, 都令自己有不同睇法, 從而令自己更加進步.就連一個路過既觀眾都給我讚賞, 那一刻才明白辛苦都值得.
做好自己
在彩排過程中, 心情都有d低落. 可能我連一個遊戲式既比賽都咁認真啦! 對一d做事不太認真的人, 我會好忟憎. 學一樣新事物, 我會將自己作為假想敵, 我一定要自己做到自己嘅標準, 我要對得住自己. 但想清楚, 做好自己才最重要. 當然能做到推己及人就最好啦!
重拾自信
那天比賽, 狀態出奇地好 (當晚是失眠的). 講真, 我一點緊張都沒有, 不是我囂張或者係信心爆棚. 到比賽完了一星期自己都唔明.
比賽中有三分一既分會睇當日跳舞嘅表現. 一去到就試跳了一次, 那一刻既感覺好實在, 比起在排舞室更舒暢. 那種感覺真係好奇妙.
之後成日人都充滿信心, 看見家人, 朋友, 同事, 一d舊同事既支持, 令到自己像身處一個非常熟悉既環境, 可能係咁, 當日表現自然及自信. 記得自己在排舞時都領略到自信心對跳舞好重要, 所以當日可以表現出自然就是來自信心.
雖然今次比賽得到一些獎項, 但重拾自信及明白減肥嘅真諦才重要. 希望所有有決心減肥既朋友, 記住”持之以恆”.
|
| |
|
